Tunisie Politique: Yassine Ayari

Tawfik Mathlouthiمرحبا بكم في برنامج تونس السياسية على قناة أمة وأمة تينيزي بالنسبة للفيسبوك. اليوم نستضيف مترشح للانتخابات التشريعية الجزئية في ألمانيا لمجلس نواب الشعب في تونس، سي ياسين العياري. ياسين العياري معروف لدى الكثير وهو ناشط يعني بلوغير بلغة الشباب، وهو مدون معروف جدا بمواقفه وبكل المواقف التي يتخذها والتصريحات، و يعني هناك أسئلة كثيرة تطرح، أولا على أفكاره السياسية التي ليست واضحة للجميع، انتماءاته غير معروفة فنريد أن نوضح هذه النقاط. نريد أن نعرف لماذا ترشح إلى هذا المنصب السياسي؟ لماذا يريد أن يمثل التونسيين في ألمانيا وهو مقيم في فرنسا؟ يعني سوف نعطيه بعض المعلومات كذلك التي استقيناها من خصومه السياسيين ولكن نحن في الحقيقة سعداء لاستضافته في هذا البرنامج ونرحب به، عسلامة سي ياسين ومرحبا بك.

Yassine Ayariيبارك فيك، بارك الله فيكم على الاستضافة. شكرا جزيلا، نحيي المشاهدين الكل. وأنا على ذمتكم سيدي.

Tawfik Mathlouthiيعيشك بارك الله فيك. الشيء اللي يعجب حتى من تدويناتك وهو أنك ديما هكا أخلاق التونسي الدمث. ما تحصلش في ردود الفعل، تقعد ديما متزن، وهذا اللي يتابعوا فيك يلاحظوه ويشوفوه. ما نجموش نتكلموا على ياسين العياري بدون ما نترحموا على والده الشهيد الذي سقط بعد الثورة، وكلكم عرفتم ذلك ووقع تكريمه à titre posthume من طرف الرئيس في ذلك الوقت السيد المنصف المرزوقي، وبدأ يبرز الناشط السياسي في تلك الفترة ياسين العياري.

ياسين العياري شنية الأسباب اللي خلاتك اليوم وأنت مهندس في حماية المعلوماتية، يعني sécurité informatique، باش تدخل في المعمعة بتاع السياسة وتخرج من حالة المدون اللي يعطي أفكار ويأثر بتدويناته باش تصبح طرف في السياسة وتفقد هالتأثير، لأنه لما تكون مدون بدون مصلحة سياسية أو مسؤولية سياسية يستمع لك الجميع لكن لما تصبح طرف سياسي يستمع لك فقط من يساندك؟

Yassine Ayariبه، اسمح لي ساعة بتوضيح بعض الأمور.

Tawfik Mathlouthiتفضل.

Yassine Ayariأنا لم أبرز على الساحة السياسية لما توفى الوالد، هذا موش صحيح. أنا مثلا مترشح للانتخابات التشريعية ضد حزب بن علي في 2009، يعني هذا قبل سنوات من وفاة الوالد. نهار عمار وسيب صالح اللي كانت خذات صدى كبير على الأنترنت وكانت أول مرة مواطن تونسي مش حزب ولا جمعية يحاول ينظم مظاهرة في تونس مش على غزة أو العراق، لا لا، على تونس وصار فيها ما صار، كانت والوالد حي. يعني ما كانش ظهوري توفى الوالد...

Tawfik Mathlouthiلا، أحنا راهو سي ياسين يلزمك تعرف اللي نستفز باستعمال ما يقال ضدك يعني.

Yassine Ayariعادي جدا، عادي جدا. فمهم نوضح النقطة هذه.

Tawfik Mathlouthiمهم جدا.

Yassine Ayariحاجة أخرى، علاش دخلت التدوين وعلاش دخلت البلوغينغ وعلاش دخلت نكتب على الفيسبوك؟ الهدف هو الفعل السياسي. يعني البلوغينغ والأنترنت ليست هدف في حد ذاتها، هي وسيلة. وسيلة للفعل السياسي وهذه كانت نقطة خلاف كبيرة جدا بيني وبين مجموعة من المدونين خدمت معاهم في فترة معينة. يعني كان بالنسبة ليهم الأنترنت هي الهدف، نلموا لجام، نحكيوا في بعضنا، نكبروا الحكاية فقط. عندي أنا كان لا، كانت فقط وسيلة.

Tawfik Mathlouthiاستعمال، نعم.

Yassine Ayariبالضبط، استعمال سياسي. يعني أنا مش نمر من مدون إلى سياسي، لا، أنا من الأول عندي أفكار سياسية لم أجد طريقة أخرى لتمريرها إلا التدوين. اليوم ثمة طريقة أخرى فلا أتردد.

Tawfik Mathlouthiوكنتوا يعني تناضلوا لأنكم كنتوا تتعداو على طريق بروكسي وتتعداو يعني لأنه...

Yassine Ayariكانت، كانت أيام، أيام عصيبة. عنا بالنوتة هادي أيام عصيبة.

Tawfik Mathlouthiبربي أنا شديت منكم واحد واللي هو أنت.

Yassine Ayariتفضل سيدي.

Tawfik Mathlouthiكان فما برشا ما يقال عن المدونين، هما بطبيعة الحال قاموا بدور كبير جدا حتى في الثورة نفسها وإن كنت أنا شخصيا ممن يعتبرون وأنه الثورة هي نتاج لنضال عشرين وثلاثين سنة لكل المناضلين السياسيين والمدونون هم من أعطوا الشرارة، فهناك من يقول وأنه فما بعض من المدونين اللي تم استقطابهم من أمريكا وجلبهم لأمريكا وتدريبهم، صحيح الكلام هذا وإلا إشاعات؟

Yassine Ayariوالله شوف، أنا سمعته مثلك، في جانب من الصحة.

Tawfik Mathlouthiنعم.

Yassine Ayariفخل نسمي الأمور بمسمياتها. يظهر لي اللي يعرفني يعرفني ما نلبسش قندورات.

Tawfik Mathlouthiفوالا.

Yassine Ayariنسمي الـ...

Tawfik Mathlouthiبالله خلينا نتكلموا من القلب للقلب، قل لي.

Yassine Ayariلا لا، من غير ما توصي.

Tawfik Mathlouthiبه.

Yassine Ayariلما نعدي في نهار عمار، بعض المدونين قالوا لي ماشيين نحكيو ونتقابلو غدوة، قالوا لي: «لا»، «علاش؟»، قالوا لي: «ماشيين لسفارة أمريكا»، «آش تعملوا في سفارة أمريكا؟»، قالوا لي: «ناخذوا في دروس نتاع جورناليزم».

قلت لهم«خميس الخياطي وفلان وفلتان تعداو بدروس نتاع جورناليزم؟ هذم شنية الحكاية؟ ما عيطولكش؟»، «لا، ما عيطوليش، وكان عيطولي ما نمشيش».

توا نحكي لك فكرني في في وسط الحوار على حكاية أخرى صارت لي شخصيا مع أمريكا.

هذا أعلمه، أعلم مثلا اللي ثمة برشة مدونين خدموا مع فريدم هاوس.

Tawfik Mathlouthiأيوة.

Yassine Ayariبه، هذا، وهم لا يستحون من ذلك وأسماءهم موجودة على الأنترنت معناها يكتبوها وحدهم.

Tawfik Mathlouthiيقروا بذلك أصلا يعني.

Yassine Ayariبه، لكن هذا ليس حال الجميع، يعني كيف ما في كل حاجة ثمة من الناس اللي تخدم...

Tawfik Mathlouthiبالطبع، بالطبع.

Yassine Ayariمع السفارة، مع...

Tawfik Mathlouthiما هو التوضيح مهم حتى لا يقع حشر من لا يستحق في موضوع يعني مبهم.

Yassine Ayariأكيد، أكيد، هما هما راهو شوف، اللي دخل في الدائرة هذي لا يستحي، يعني تلقاها باسمه ولقبه على الموقع نتاع الجمعية اللي يتعامل معاها ولا مع السفارة، تلقاه في تصويرته يضحك واضحة مع يعني، لكن وين ثمة سوء نية؟ ثمة في بالذات حطان الناس الكل في فرد...

Tawfik Mathlouthiفي نفس الـ...

Yassine Ayariفي نفس القفص، وهذا خطير، وهذا موش صحيح.

Tawfik Mathlouthiنعم.

شنية الدوافع نرجع للسؤال الأول اللي خلاتك باش تترشح اليوم وتدخل في عراك سياسي وفي المعمعة السياسية مباشرة وليس فقط في معركة الأفكار؟

Yassine Ayariبه، هدف السياسة هي تغيير الواقع.

أحسن طريقة لتغيير الواقع هي...

Tawfik Mathlouthiتغيير الحال.

Yassine Ayariتغيير الواقع المعاش، يعني الواقع السياسي، واقع جميع الناس.

Tawfik Mathlouthiنعم.

Yassine Ayariهي الوصول إلى الدولة بطريقة أو بأخرى.

Tawfik Mathlouthiأن تكون فاعلا.

Yassine Ayariبالضبط، الهدف متاعي هو تغيير الواقع. لما كان عندي كان صفحة فيسبوك حاولت تغيير الواقع برفع درجة الوعي عبر هذه الصفحة. اليوم عندي إمكانية لممارسة نفس الدور تغيير الواقع عبر طريقة أخرى، فدقيت الباب بدون تردد يعني je suis dans la continuité نتاع اللي شـ بديت نعمل فيه من 2007، 2008، 2009 وكما قلت لك أنا ترشحت في 2009 ضد حزب بن علي وصارت فضيحة يعني ما أكتبه على النهارين هذوكم نتاع الترشح يعني يكتب يكتب كتاب.

Tawfik Mathlouthiفي الشأن العام يعني، نعم.

يعني اللي يقولوا اللي أنت ما برزت كان بعد استشهاد الوالد هذا يعني ظلم.

Yassine Ayariلا، ممكن هما عرفوني وقتها.

Tawfik Mathlouthiأيوة.

Yassine Ayariوهذا معروف لأني أنا حتى ليوم 14 جانفي 2011 الصفحة الشخصية نتاعي نتاع الفيسبوك تدخله كان بالبروكسي.

Tawfik Mathlouthiسي ياسين، فما برشا كانوا حاسبين لك قريب لست نهضاوي ولكن قريب من النهضة وفما اللي يقولوا لا، ما عندوش علاقة بالنهضة، هو قريب من مؤتمر من حزب المؤتمر، يعني ماك تعرف الناس، مادام ما حطوش واحد في خانة يقعدوا النهار الكل يلوجوا عليه، شنية التيكيت بتاعك عايشك؟

Yassine Ayariأنا جميع التيكيات الممكنة خذيتها.

Tawfik Mathlouthiأيه باهي، مبروك عليك.

Yassine Ayariيعني من 2007 لليوم،

Tawfik Mathlouthiنهنئوك، عايشك.

Yassine Ayariاتقال عليا، كيفاش بدات؟ بدات مع النقابيين الراديكاليين، ومن بعد هذايا غوش، الغوش الخايب، ومن بعد هذايا نهضاوي، ومن بعد هذايا سلفي جهادي جملة.

Tawfik Mathlouthiكيفاش تنجم تقرب ما بين يساري استئصالي ونهضاوي بالله؟

Yassine Ayariإيه، لأنه ثمة رغبة في السهولة، ياخذ لك موقف معين يشوف لمصلحة شكون يصب ويحط لك التيكيت هذيكة.

Tawfik Mathlouthiأيوة.

به.

Yassine Ayariيعني لما تدافع،

Tawfik Mathlouthiوفي الحقيقة شكونه ياسين العياري؟

Yassine Ayariلما تدافع على حق المتدين تولي نهضاوي، لما تدافع على حق الزوالي يحط لك...

Tawfik Mathlouthiيساري.

Yassine Ayariبالضبط، في حين أنه ما هم، ما ثماش اختلاف، أنا ندافع على الحقوق، يعني ما يـ مانيش في كاز واحدة، لا، كل ما ثمة ظلم أنا ندافع عليه بغض النظر على الـ...

Tawfik Mathlouthiشنية اتجاهاتك السياسية؟ يعني يساري، ليبرالي،

Yassine Ayariيسار، يسار اجتماعي، لكن اليسار اللي عدوه الفقر، مش عدوه هوية الناس.

Tawfik Mathlouthiنعم.

Yassine Ayariفي هذا في كلمتين، اللي عنده حساسية كبيرة لمسألة السيادة الوطنية.

Tawfik Mathlouthiأيوة.

Yassine Ayariهذا اليسار،

Tawfik Mathlouthiمش يساري عندك حساسية على كل ما هو دين حتى حتى يعني من التطبيق الديني العادي؟ يعني مثل ما، ما نشوفوا اليوم حاليا بتصريحات رهيبة يعني.

Yassine Ayariلا لا، بالعكس، لا لا لا. أنا كان شفت مواقفي، اليسار اللي ننتمي له أنا يدافع على حق المتدينين مهما كان، وفي أقصى درجة، وحتى علاش قتلك وصلوا حطوني حتى سلفي جهادي رغم أني ننتمي لليسار الاجتماعي،

Tawfik Mathlouthiنعم.

Yassine Ayariلأنه في الأمور هذيا واضح وقاطع وما نلبسش قندورات ولا أريد أن أعجب، يعني في حق في في كل ما هو هوية المواطن، في كل ما هو دينه، في كل ما هو عادات وتقاليد، وفي كل في كل في في تركيبته النفسية، أنا لا أرغب في تغييرها أو في تبديلها، أنا نعرف المواطن التونسي، اللي يحب يمشي للجامع من حقه ما نسكروش الجامع، اللي تحب تعمل الحجاب تعمل الحجاب، كي تدافع عليهم، انتي قيدك، لا، ماك...

Tawfik Mathlouthiواللي يحب يمشي يحوس، يمشي يحوس.

Yassine Ayariبالضبط.

Tawfik Mathlouthiنعم، هذه هي الحرية.

Yassine Ayariبالضبط.

Tawfik Mathlouthiبالله في شخص أنا تحدثت معاه هو من المهنة، قلت له: «سوف أستضيف ياسين العياري»، فقال لي: «آه، هذاك يحب يولي ديبوتي خاطر عنده قضية في تونس باش ياخذ الحصانة».

Yassine Ayariإمم.

Tawfik Mathlouthiبالله نحبوا نحيو هالنقطة هذيا، نفسروها بكل وضوح ونتجاوزوا حتى لأنه الناس قاعدة تروج في حاجات،

Yassine Ayariمهم، مهم جدا.

معقول ومفهوم، مفهوم. الحصانة هي نتيجة وليست هدف. يعني أنا لما ترشحت كانت عندي أسباب واضحة للترشح، يعني نعمل في الشيء هذايا، مترشح حتى قبل ما عندي قضية وما عندها حتى علاقة بالقضية. الحصانة كان تصير ستكون نتيجة، معناه مش هدف، ونزيد نعطيك un scoop سيدي. الحصانة كان خذيتها ستسمح لي ندخل لتونس من غير ما نتسلسل، معناه ما يصيرليش كما المرة اللي فاتت من المطار للحبس، لكن كل قضية سأدعى إليها سأتنازل طوعا عن الحصانة ونفضل قضاياي خوما سرا، ما عنديش مناش نخاف. أنا أعلم أن كل القضايا هذي سياسية، politique، وكيفاش عاملين لي: يسيبوا القضية تمشي باش من المطار للحبس.

Tawfik Mathlouthiبعد الثورة رجعنا لنفس البراتيك يعني؟

Yassine Ayariبالضبط إي.

Tawfik Mathlouthiبالله كيفاش يعني؟ أنت أنت اللي يعني ناشط ومناضل في عهد بن علي وبعد بن علي وعايشت الفترتين عن كثب يعني، وكنت من الداخل، ما يألمكش وأنك بعد ما ثورة وحرية نسيروا نفس يعني حليمة ترجع لعاداتها القديمة؟

Yassine Ayariوالله فات من آلمني، أدماني. بن علي خيرني بين الحبس أو المنفى، فخرجت من تونس مطرد في أوت 2010، أنا اخترت المنفى. هذم لم يكونوا حتى بكرم بن علي، ماعطاونيش الخيار، فرضوا عليا السجن ثم المنفى.

Tawfik Mathlouthiولما نقول هاذم شكون من الأطياف السياسية؟

Yassine Ayariالحاكمون، اللي يحكم.

Tawfik Mathlouthiاللي يحكم، شكون يحكم اليوم بالله؟

Yassine Ayariبه، هذا موضوع،

Tawfik Mathlouthiما هو هذا سؤال مهم جدا.

Yassine Ayariهذا موضوع يعني،

Tawfik Mathlouthiأنت باش تحب تغير الواقع، لما إنسان يحب يغير الواقع من ضمن عناصر الواقع هو الحاكم، فالحاكم من هو الحاكم اليوم؟ لأنه هناك من يختفي، هو يحكم ويقول لا يحكم.

Yassine Ayariنعرف، الحاكم اليوم تتوزع معناه دمه بين القبائل، عنا الشيخين، عنا كمال اللطيف، عنا وزارة الداخلية، عنا لوبيات، يعني معروفة ويطول الشرح، وهي تطلب حلقة كاملة.

Tawfik Mathlouthiنعم، لكن مهمة لأنه البلاد تئن من هذا.

Yassine Ayariأكيد، أكيد، والنتيجة رانا نشوفوا فيها اليوم، يعني هذا يتطلب حصة باش يخرجنا ممكن على الموضوع، نعملوا قعدة أخرى كان تحب على الـ...

Tawfik Mathlouthiحاضر، حاضر.

Yassine Ayariفبالنسبة للحاكمين، هاني قلت لك، أنا ما نعرفش كان عندك فكرة على...

Tawfik Mathlouthiالنهضة تسمع لها خطابين: خطاب من جهة ما هيش تحكم مسكينة، ومن جهة عندها وزراء وقاعدة تزيد في عدد الوزراء.

Yassine Ayariلا لا، الحكم هاذيكا جزء من الحكم، هذاك التنفيذي على الأقل، أنا اللي يهمني في مشكلتي مع سياسات حركة النهضة هي التشريعي، يعني الناس قد ما طلبت الثقة على برنامج معين ورؤية معينة وريناهم اليوم ما هومش في، يعني لو توافقوا لما فيه خير للبلاد والله صحة، لكن يتوافقون ويتبعون للإفلات من العقاب، للتغطية على التعذيب، لضرب كل اللي ربحناه في خمس سنين في خمس سنين ثورة، فهذا...

Tawfik Mathlouthiيعني يا خيبة المسعى إذا كلامك صحيح اللي نسمع فيه.

Yassine Ayariيعني أنت تونسي وتوا عايش معنا الوضع، أنا لا أتبلى عليهم ولا على غيرهم، يعني الوضع مؤسف، فعلا. لما تشوف نواب، الإنسان يتقدم إلى الناس يطلب ثقة علاش؟ لينوب هك هؤلاء الناس، يعني شنية خدمة النائب؟ ما نجموش نحطوا 11 مليون تونسي يعطيو رايهم ولا يختاروا آش يحبوا، يختاروا، يختاروا ناس،

Tawfik Mathlouthiمعروف، نعم. هذه هي الديمقراطية التمثيلية.

Yassine Ayariبالضبط، يختاروا ناس باش يدافعوا على مصالحهم، لما تلقى نواب يضربوا ضد مصالح الناس اللي انتخبوهم، نواب تسكت على التعذيب، نواب تعطي ميزانية بالطريقة هذيكة، نواب تسمح للأمنيين باش يصوتوا، نواب تسامح فيما لا تملك، يعني تسامح في حق في حقوق التوانسة اللي انتخبوهم، تعطي، تعطيهم صك براءة ليرضى الباجي قايد السبسي، فهي خيبة المسعى، فهم خانوا الأمانة، بالمعنى النيابي، يعني أنا الزاويه اللي نحب نغزر منها ديما هي صو، معناها زاوية مجلس النواب لأنه مجلس النواب هو من يمثل الشعب، هو الوحيد اللي المفروض يحمي هذا الشعب ضد تغول البقية.

Tawfik Mathlouthiبه سي ياسين، لنفترض ونتمنى لك كذلك que le meilleur gagne وأنه تم انتخابك. أول شيء الفترة هي نصف فترة.

Yassine Ayariأقل حتى.

Tawfik Mathlouthiأحد المترشحين جالس في مكانك تبجح بكونه إذا تم انتخابه هو فسوف يوفر على نفسه ستة شهور إلى سنة في معرفة أركان البرلمان لأنه يعرفها، وهذا حسب ما فهمت من برنامجه اللي معاه سي منار اسكندراني، هو هذه الميزة الوحيدة اللي عنده في ترشحه لهذا المنصب، أنت شنو تنجم تعمل في ها العامين اللي مازالوا؟

Yassine Ayariبه، ما نحبش نعلق على اللي قالوا المترشح هذاكا،

Tawfik Mathlouthiلا، هذه سياسة، هذه، ما هواش أمر شخصي هذا.

Yassine Ayariيعني الـ الـ الدستور اللي يضبط خدمة البرلماني موجودة، الثقافة البرلمانية تكونت بشوي بشوي حتى عند التونسي العادي عبر المداولات اللي تصير في التلفزة والبث اللي يصير، القانون الداخلي للمجلس متوفر للعموم وقريته، يعني ما تطلبش الأمر باك بلوس 9 باش تجي تعرف خدمة الـ خدمة النائب.

به، خل نحط الحاجة في إطارها. ثمة الأهداف القريب،

Tawfik Mathlouthiنعم.

Yassine Ayariوالهدف المتوسط.

Tawfik Mathlouthiتفضل.

Yassine Ayariبه، بالنسبة للأهداف القريبة، باش نقول لك عندي برنامج يدوخ، أحنا ما، ما عناش الكلام هذايا، أحنا نكونوا واقعيين مع الناس. هو مقعد واحد، في ظرف سياسي معين، لفترة محددة، لن يغير تونس في الـ في الـ، على الأقل في الأهداف القريبة.

Tawfik Mathlouthiلو قلت العكس لما صدقك أحد.

Yassine Ayariلا، نكون واضحة مع الناس، ثمة ناس تحترمني، نحترمهم، وأنا أحترم الناس وأحترم المخاطبين، ديما المخاطبين. ثمة ممارسات شفتها هنا في أوروبا، شفت العمل النيابي كيفاش يصير في أوروبا، واحدة من الأهداف متاعي، أن هالعمل طريقة العمل الأوروبية هذيا، l'occidentale، بالنسبة لكل ما هو عمل برلماني، ندخلها لتونس، ندخلها لعادات نتاع النائب، نعطيك مثال بسيط.

تعرضت لمشكلة هنا مع البريفيكتور، عقدوا لي بعض الأمور، وعلاش؟ خاطر بلادي بعثت فيشة للبريفيكتور.

Tawfik Mathlouthiبريفيكتور للي يسمعوا فينا ما، نجموا نقارنوه بالولاية في تونس، ولكن المتخصصة في الأمن، لأنه في النظام الفرنسي عندهم الولاية الإدارية والسياسية كما الولاية بتاع تونس ولا بتاع رادس ولا غيره، وعندهم ولاية شرطة اللي تهتم بكل ما هي أحوال مدنية وأمور الشرطة.

Yassine Ayariبه، دقيت الباب على الديبوتي، النائب بتاع البلاصة اللي نسكن فيها، قلت له: «يا سيد، أنت نائب شعب، وأنا مواطن، صحيح مانيش فرنساوي لكن مقيم في المنطقة اللي أنت عليها، عندي مشكلة مع الولاية، تفضل حل لي مشكلتي».

ما راني إلا بعد أسبوع جاني مراسلة من عنده رسمية من مجلس نواب الشعب، بعثها للولاية، وقال لها، وجاوبني رد الولاية عاود بعثه لي، فطريقة العمل هذيا عجبتني برشة.

Tawfik Mathlouthiبالطبع.

Yassine Ayariبه، قلت أنا في الأول، أنا مهندس إعلامية، كان نجمع l'utile à l'agréable، علاش ما عندوش النائب اليوم، موقع ويب، كل مواطن تظلمه الإدارة، ما عندي فريق بالطبيعة يخدم معايا، يبعث، وتجيه المراسلة، وما تكونش بمنطق أكتاف ولا تدخلات، لا لا، تتحط على السيت ويب، هذه المراسلة تعدات للوزير الفلاني، به، حاجة بسيطة هي،

Tawfik Mathlouthiيبعث له، نعم.

وتكون في الـ territorialité بتاعه، تابعة منطقته يعني،

Yassine Ayariلا، مش حتى، مش حتى مش شرطية، لأنه النائب لما يوصل لمجلس النواب هو نائب كل الشعب.

Tawfik Mathlouthiطبعا.

Yassine Ayariلما تكون نائب على،

Tawfik Mathlouthiلكن أولوية للي انتخبوك.

Yassine Ayariبالضبط، أكيد، هذا ما فيهش، هذا ما فيهش نقاش. به، بالنسبة للـ، نزيد نكمل لك في الأهداف القريبة، باش نحاول نرفع مساءلة التنفيذي إلى درجة غير مسبوقة، لأنه ثمة تقصير كبير اليوم. وزير يزلط، نواب الشعب أغلبهم على الأقل، جزء كبير منهم، لأنهم في ائتلاف حكومي أو لأن وزير صاحبهم ولا لأنهم ما يحبوش يغششوا مولى الوزير، فيطفيو الضوء، هذا غير مسموح.

Tawfik Mathlouthiكلها توازنات اليوم.

Yassine Ayariباهي، هذا فاش يجي قوة المستقل.

Tawfik Mathlouthiنعم.

Yassine Ayariتوازناتهم لا تعنيني، وثيقة قرطاج نتاعهم لا تعنيني، يعنيني الدستور التونسي.

Tawfik Mathlouthiما عندكش إحساس وأنك مش تكون كما دون كيشوت يعني وطواحين الريح يعني؟ وحدك أنت يعني هاجم على مجموعة؟

Yassine Ayariلا لا لا، القانون، تفضل سيدي، القانون يعطيك الحق كنائب من حزب عنده 50 نائب ولا كنائب واحد حتى شيء ما يمنعك أنك تاخذ وريقة وتسائل، وتتحصل، تسائل الحكومة وتصبها في إدارة المجلس، بعد ثمان أيام تمشي للوزير وهو مطالب بالإجابة عليها.

Tawfik Mathlouthiنعم.

Yassine Ayariسنراقبهم. هذا الماء مسيب على البطيخ وبلاد بلاش أمالي انتهى.

Tawfik Mathlouthiبه، كيفاش أنت تسوق للحملة بتاعك لدى الناخبين في ألمانيا؟

Yassine Ayariتوا نجيو، خل نكمل لك الأهداف،

Tawfik Mathlouthiلا، خاطر ما هو الوقت،

Yassine Ayariآه، لا لا، ما تبداش تتشحت لي عاد، به، خل ننقز لك مالا، خليوهم الأهداف القصيرة، مازالت، وننقز لك الأهداف الطويلة.

Tawfik Mathlouthiإيه، عايشك، أعطيني الأهداف.

Yassine Ayariالأهداف الطويلة 2019.

Tawfik Mathlouthiنعم.

Yassine Ayariتخيل نائب يوعد بأمور ويعملها، نائب ينتخبوه الناس من غير ماكينات فقط أنه خاطب ذكاء الناس مباشرة.

Tawfik Mathlouthiنعم.

Yassine Ayariتصور أنت نائب يحضر، نسبة الحضور متاعه مرتفعة جدا في المجلس. في 2019 لما تصير انتخابات في تونس الكل، اللي عملوا برنامج وتقدموا به في 2014 باش يجيو في 2019 يكذبوا نفس الكذبة، ويبرروا علاش ما نجحوش في وعودهم،

Tawfik Mathlouthiهو في الحقيقة وصلوا لأنه القواعد بتاعهم انتخبتهم.

Yassine Ayariلا، ثمة جزء، le noyau dur بتاع القواعد، وثمة ناس برشة ناس صدقتهم.

Tawfik Mathlouthiنعم.

Yassine Ayariتوا في 2019 باش يجي يكذب، هاو ثمة نائب وعد وأوفى، هاو ثمة نائب احترم عقول الناس،

Tawfik Mathlouthiصح، عندنا مرجعية، مش كما، نعم، مش كما الانتخابات الأولى، نعم.

Yassine Ayariبالضبط، بالضبط. حتى الشباب اللي نسبة العزوف تاعه على السياسة رهيبة، اليوم، خل، أهل السياسة،

Tawfik Mathlouthiسي، سي ياسين المشكلة في تونس اليوم، أنا كصحافي، كملاحظ، وأنه الشوانط بلغت، الشوانط رهيبة، يعني عندك الشانطي الاقتصادي، الشانطي الاجتماعي، الشانطي الصحي، يعني من فم، منين باش تبدأ؟ يعني هذي هي السؤال الموجه للسياسي اليوم.

Yassine Ayariطريق الألف خطوة يبدأ بخطوة، أحنا نحكي لك حاجة،

Tawfik Mathlouthiنعم.

Yassine Ayariمن عشرين سنة لتالي، آباءنا قالوا الحكاية يلزمها عشرين سنة باش تصلحها،

Tawfik Mathlouthiأيوة.

Yassine Ayariما عملوا شيء، وفِقنا بعد عشرين سنة،

Tawfik Mathlouthiاليوم هانا فيها، إيه.

Yassine Ayariاللي ما عملوا شيء ويلزمنا عشرين سنة أخرى، يا سيدي خل نبدأ بخطوة أحنا، يعني ريت البحيرة الكبيرة هاديكا تتجمع من قطرات صغيرة صغيرة،

Tawfik Mathlouthiبالطبع، بالطبع.

Yassine Ayariوأحنا من مبدأ أنك تعمل شوية حركة تشعل حتى شمعة صغيرة خير ملي تقعد تسب في الظلام صباح وليل.

Tawfik Mathlouthiشنو اللي كان الدافع، نرجع وندور معليش سامحني،

Yassine Ayariدور.

Tawfik Mathlouthiلهذا الترشح، أنت حسب ما قريت أنا شخصيا في تدويناتك لأنه أحنا، يعني في الفيسبوك مع بعض، قريت وأنك أنت في الأول لما ترشحت وأنك لصد الطريق لولد، لولد بوه حافظ قايد السبسي،

Yassine Ayariإمم.

Tawfik Mathlouthiوبعد سي حافظ قرر أنه: «ما أعلنتش أنا ترشحي ومانيش باش نترشح»، يعني أنت شنو هو وضع، وضعك في هذا؟ في الأول أنت سيادتك كان برنامجك وأنك تحب تسكر على ولد بوه لأنه يزي من المحسوبية.

Yassine Ayariإمم، به. تفضل. ساعة ولد بوه كشخص ما عندي معاه حتى مشكل، ربي،

Tawfik Mathlouthiعارفين، مش كشخص.

Yassine Ayariمع، ما يمثله،

Tawfik Mathlouthiنعم، أحنا سياسيا، نعم.

Yassine Ayariبه. لما ترجع للفيديو الأولى اللي عملت بها الترشح،

Tawfik Mathlouthiأيوة.

Yassine Ayariاللي منشورة على الأنترنت، صد الطريق على حافظ بما يمثل كان هدف من الأهداف،

Tawfik Mathlouthiنعم.

Yassine Ayariوالحمد لله تحقق، لأنه لو يقول ما كنتش مترشح، لا لا، أعلن على الترشح وجاء حتى لألمانيا جمع قبل ما يوفى التسجيل وقابل الناس في ألمانيا ودار دورته وأقنعه راشد الغنوشي باش ما يترشحش بشق الأنفس. هذي ليست تحاليل، هذي معلومات، لأنه فهم اللي حتى اللي عمره ما انتخب، مستعد يهبط،

Tawfik Mathlouthiوعلاش سي راشد الغنوشي يقنعه؟

Yassine Ayariحساباتهم سياسية، حلفاء، هذه أمورهم الحزبية ما تعنيناش به.

Tawfik Mathlouthiبه.

Yassine Ayariحتى اللي عمره ما انتخب كان مستعد يهبط 900 كلم وينتخب ضد حافظ قايد السبسي، وفهم هذا، يعني هذا هدف لول تحقق، لكن في الفيديو اللي أعلنت فيها الترشح لم يكن هذا الهدف، هذا هدف على أهميته هدف تافه. قلت: «إني أتصور إني قادر نفيد، عندي ما نقدم للبلاد في المرحلة هذي، البلاد مستحقة شباب، شباب فاهم، شباب بعيد على الحسابات والتكتيكات نتاعهم الحزبية الضيقة، شباب قادر يعطي المثل ويرجع الأمل للناس في خدمة السياسة». أحنا شعار الحملة حتى كان اسمه: «تونس تستحق ما خير».

Tawfik Mathlouthiصحيح.

Yassine Ayariيعني لما تشوف النواب آش قاعد يصير والفضايح في كل القوانين اللي تعدات ونسب الحضور، ولينا النواب، في الغرب النواب يعرفوهم بمشاريع القوانين، أحنا ولينا نعرفوهم بالفضايح: هذا متاع سكايب، هذا متاع بيسين، هذا متاع درا شنو.

Tawfik Mathlouthiلا حول ولا قوة إلا بالله. أنا لما شفت معلومة على كونها يعني بسيطة جدا fait divers insignifiant، لكن تبسمت في داخلي لما قريت وأنه لومبرياج نتاع كرهبة خلاها بيك وما نجمتش تعمل اجتماع، علاش تبسمت؟

Yassine Ayariإيه.

Tawfik Mathlouthiلأنه من بعض المعارضين يقولوا: «آه ياسين العياري يلعبها وهو في الحقيقة حمد بن جاسم آل ثاني ممول له الحملة، وهاو تصاور، وهاو كذا»، فقلت لو كان حمد بن جاسم مول له الحملة راهو الراجل يحوس في جاغوار ولا يحوس في رولز رويس، مش في كرهبة لومبرياج نتاعها طاح أون بان.

Yassine Ayariتعرف المحزن أكثر؟ توا هي الحكاية اللي خرجت التصاور هذوكم هي جريدة هزلية، ومركبة تصاور، وقاطرة مركبتهم في نفس الموقع.

Tawfik Mathlouthiصراحة ما تعرفوش الرجل؟

Yassine Ayariمنين نعرفه يا راجل؟

Tawfik Mathlouthiجاب كلام عاد.

Yassine Ayariجملة، جملة، هذاك اللي مازال. تعرف ما يحزني فعلا؟ أن ثمة مترشحين يستعملوا فيها جد عليهم،

Tawfik Mathlouthiأيه.

Yassine Ayariالمزعجني أنه أنت يعني جريدة هزلية، تكتب لك إنها هزلية، وتستعمل المعلومة جد عليك، هل عندك المستوى فعلا باش تكون نائب شعب؟ يعني محزني ما نحبش ندخل نحكي على شكون المترشحين، لكن لما مترشح ويحب ياخذ مسؤولية نتاع الشعب ويصدق حكاية كيما هذه وهي راهي الجريدة كاتبة أنها جريدة هزلية والصورة مركبة معناها في نفس الخبر، ويصدق ويتعامل معها كمعطى، هذا مؤسف.

Tawfik Mathlouthiأنا نحب إحقاقا للحق نقول حاجة وأنه هناك ردود فعلية، ردود فعل عفوا شعبية كبيرة ياسر لأنه تجيني كثير الاتصالات وفي الأسبوع اللي فات جاتني اتصالات كثيرة: يا أخي وينه سي ياسين العياري؟ علاش ما استدعيتولناش ياسين العياري؟ قلت لهم في قلبي أنا ياسين العياري كلمته قبل ما نكلم أي شخص ثاني وقبل ما نعدي الضيف سي منار اسكندراني، هو أول واحد لكن الظروف شاءت وأنك أنت تجي فيما بعد، فيعني عندك، السؤال اللي نحب، عندك شعبية، هل في الاجتماعات اللي بديت تقوم بها للحملة حسيت بهذا الالتفاف حول شخصك وحول مشروعك؟

Yassine Ayariنحب نعتذر منك أخرت أنا في اللقاء لأني كما قلت لك وقتها، نخدم خمسة أيام في الجمعة، ناخذ سوايع زايدة باش ننجم نمول الحملة، وفي الويكاند للـ déplacement.

Tawfik Mathlouthiلا لا، ما هو باش المشاهدين ما يلوموش عليا، يقولوا لي: «سؤال».

Yassine Ayariإي، لا لا، معقول، معقول، به. فذاك كان الوقت صعب، به. بالنسبة للحملة، هي تبدأ بعد غدوة،

Tawfik Mathlouthiرسميا، إيه نعم.

Yassine Ayariرسميا. اللي عملناه قبل ما كانش في إطار حملة انتخابية، كنا نمشيوا نلوجوا على، خاطر أحنا ما عناش، ما عناش ماكينة،

Tawfik Mathlouthiزيارة.

نعم.

Yassine Ayariنشوفوا شكون متطوع، يحب يكون منسق الحملة، فأحنا نختاروا في منسقي الحملة ونظموا فيهم، يعني ما كانتش ثمة اجتماعات شعبية، لكن كانت اجتماعات مع مع الناس، لكن حتى،

Tawfik Mathlouthiلكن فما ردود فعل فـ...

Yassine Ayariبالنسبة لردود الفعل،

Tawfik Mathlouthiنعم.

Yassine Ayariالحمد لله، العرض نظيف، والله ما وطأت مكانا إلا وأخذت بالأحضان،

Tawfik Mathlouthiالحمد لله، الحمد لله.

Yassine Ayariوالله بيتوني في ديارهم. ونحكي لك طرف، نحكي لك طرفة، ثمة شكون جاء استقبلني وحكينا في هامبورغ، من بعد شفته، «يا ولدي فك علينا»، هزني نتعشى بحذاه، قال لي: «لقيت على الفيسبوك اللي أنت تحب الملوخية ومرتي من العشية طيب في الملوخية».

Tawfik Mathlouthiكثر خير الناس، إيه.

أمر يأثر يعني الإنسان.

Yassine Ayariيعني باش تشوف حاجات كما هكا، وقت اللي طاحت الكرهبة أون بان، اللي يحب يعطينا كرهبته باش نروحوا بها، اللي باش يبيتنا، اللي ما عندكمش فلوس أنا نخلص لكم أوتيل، اللي، يعني والله شعب باهي،

Tawfik Mathlouthiالحمد لله.

Yassine Ayariشعب باهي، أنا أنا متفائل الخير.

Tawfik Mathlouthiإذا شنو اللي خلانا نوصلوا للوضع اللي فيه تونس اليوم؟ وفما نقطة ما نجموش نفوتوها: فما انحلال أخلاقي، فما تدهور أمني، فما يعني مش كان الاقتصاد راهو والبطالة، فما هذه المشاكل الاجتماعية الحقيقية وشنية حلول مثلا، إيش مقترحاتك لهذه الأمور؟

Yassine Ayariلا، الانحلال موجود وواقع ونشوفوا فيه، لكن أنا أعتقد، أنا من الجماعة اللي تفسر كل شيء بالاقتصادي. لما الناس تجوع، تتعب، تخاف، ما عادش المستقبل غير واضح، فهذا ينعكس على طبايعها ويخرج فيها طبيعة التوحش، يعني الكل،

Tawfik Mathlouthiتنسد الرؤى، ما عادش فما حتى...

Yassine Ayariبالضبط، ولما يفقد الأمل، واحد ما عادش غدوة باش يخدم ولا مش باش يخدم، ما عادش غدوة الزيادة قداش، المستشار اليوم قال لي الجرايات نتاع نوفمبر ممكن ما تتصبش، يعني في في في مناخ الخوف والـ insécurité والـ incertitude والناس مش عارفة des repères والرئيس عمره 91 سنة، شوف يحضر شوف لا، ينجم يخدم ساعتين في النهار، الأحزاب تتضارب، يوسف الشاهد ينحيوه ويخليوه، فالـ sentiment هذايا يخلي،

Tawfik Mathlouthiنعم.

ثمة حتى شكون يدون كي روبير موغابي طاح، قال«فرحنا خاطر توا ولى رئيس تونس هو أكبر يعني chef d'État، أكبر رئيس في العالم سنا يعني».

Yassine Ayariبه، نزيد نرجع لك تفكر أنت أول الثورة آش كان الشعار؟ «اللي ما عنداش يهز بلاش» وخرج أحسن ما ثمة في الشعب التونسي.

Tawfik Mathlouthiصحيح.

Yassine Ayariوشفنا التوانسة ما عندهاش بعثت الحليب، ولاد، ولجان حماية الثورة، وبعثت لراس جدير، واليوم يبراكيو، أكل، أكل العام كانوا يحميو في المواطنين، علاش؟ لأنه كي ثمة أمل، الأمل يخرج أحسن ما ثمة في البشر. ثمة حلمة كبيرة،

Tawfik Mathlouthiولجان حماية الثورة في الأحياء، إي إي.

لما يفقد الأمل؟

Yassine Ayariبالضبط، وهذوما يحبوا ينحيو الأمل، بطريقة تصرفهم، بالقوانين اللي يعملوا فيها، بالبوليسية اللي سيبوها علينا، بالاقتصاد الخامج اللي عملوه،

Tawfik Mathlouthiالسؤال قبل الأخير، كيفاش ترى تشبيب الطبقة السياسية سي ياسين في تونس؟ أنا مثلا نعطي محاضرات وذهلت في جورجيا أصغر وزير 24 سنة وأكبر وزير سنا ورئيس الحكومة 36 سنة، ونحنا رئيس الدولة ربي يطول في عمره 91 أو 92 وكلهم يعني معنا نادي الشيوخ، club des séniors، كيفاش تشبيب الحياة السياسية؟

Yassine Ayariبه، هذا واحد من الأهداف اللي معمولة للحملة هذي.

Tawfik Mathlouthiنعم.

Yassine Ayariنحب نوريو للشباب أنه ممكن، أنك لما تكون صادق مع الناس، تخدم مش كان نهار الانتخابات جيت وري في روحك، لا تخدم وتدفع الثمن وتنجم توصل من غير ماكينة، ممكن، ناس أذكياء فقط،

Tawfik Mathlouthiبصدق وإخلاص.

Yassine Ayariبالضبط، خاطب عقولهم، ما تدروش عليهم، خاطبهم مباشرة الخطاب يوصل. هذا من أهداف 2019، نحلوا الباب لتشبيب الطبقة السياسية، خلي الشباب يثق في روحه، لأنه اليوم تجي تقول له، يقول لك: «وخي، الناس تفرق في الفلوس، الناس عندها ماكينة، الناس تدور على الجوامع، الناس تدور درا شنو، كيفاش نخلق؟ شكون يسمعني؟».

واحدة من الأهداف علاش الحملة اسمها، القائمة اسمها «أمل»، نحبوا نعطيو أمل للشباب، يا سيدي هاو نمد لك يدي، غدوة نوصل ونمد لك يدي ونطلعوا شباب خل نفكوها فكان.

Tawfik Mathlouthiتونس خير اللي تخدم عليها،

Yassine Ayariتونس تستحق ما خير.

Tawfik Mathlouthiتستحق ما خير والناس الكل ما فماش واحد ظاهر لي عاقل ما يحبش وأنه تونس تستحق ما خير. شنية الحلول بالنسبة للبطالة بكل سرعة يعني؟ ولو أنه الديبوتي مش هو اللي مشرف لكن في حركة سياسية وفي يعني إرادة تغيير لازم يكون عندك يعني أفكار، شنية أفكارك في حل مشاكل البطالة؟ أفكارك في حل المعضلة الاقتصادية؟ وكذلك في نقطتين وهذم الأسئلة الأخيرة: السياسة الخارجية التونسية التي هي منعدمة أو تكاد تكون منعدمة، موقف تونس من القضايا الأساسية مثل فلسطين أو القضايا في العالم العربي، هل ممكن بعجالة تعطينا تلخيص لكل هذا؟

Yassine Ayariبه، تونس كيما واحد أصلع ولحيته كبيرة، غزارة في الإنتاج وسوء في التوزيع. مشكل تونس راهي ترتيب أولويات.

Tawfik Mathlouthiحلوة الصورة هذي، يعني فرطاس ولحيته كبيرة.

Yassine Ayariالشعر موجود، لكن موزع بالغلط. لما تشوف أنت اليوم اللي واردات الفلاحة فاتت واردات السياحة وتشوف قداش يصرفوا، ماء برك ما نحكيش على الفلوس، للسياحة والفلاحة، تفهم اللي ثمة اختلال، وهذا مفهوم، علاش؟ لأن الناس اللي تحكم توا عايشة بعقلية عام سبعين، عام ستين، عام خمسين، مش مواكبة عصرها. اليوم l'investissement، الماء أغلى من البترول بعد عشر سنين، l'investissement في الفلاحة هو مفتاح دولتنا، واللي ما فهمش هذا وقاعدين يصرفوا على السياحة،

Tawfik Mathlouthiوهالصابة اللي ربي عاطيهالنا صابة الزيتون،

Yassine Ayariوهذا بالجهد الأدنى،

Tawfik Mathlouthiوالتمور بالجهد الأدنى، نعم، نعم.

Yassine Ayariبالجهد الأدنى، يعني ماهوش ماهيش في استراتيجية الدولة، وزارة الفلاحة يعطيوها لسمير بالطيب يعني مع احترامي ليه، لكن ماهوش الشخص الأكفأ في الحكومة يعني خذ وز وزع رى.

Tawfik Mathlouthiيعني نشتكي من الكفاءات.

Yassine Ayariمستقبل مستقبل البلاد تونس في الفلاحة. بالنسبة للسيادة الوطنية خذوا عليا عهدا سيدي: لو كان وصلت للبرلمان، وسفير فرنسا ما زال يستبيح تونس كما يفعل، حسبها عزبة السيد الوالد، سأسائله وسأسائل وزير الخارجية وسأراسل وزارة الخارجية الفرنسية لهنا، ثمة أعراف دبلوماسية وثمة سيادة نتاع دول، لما نكون نائب شعب وهنا عندي السلطة باش نخاطب،

Tawfik Mathlouthiأنا في، سامحني، في فترة معينة فكرته نائب تونسي.

Yassine Ayariهو المقيم العام، ويتصرف كالمقيم العام، وما لقى حد يقول له: «يا سيدي، احترم نفسك»، فتخيل لو سفير التونسي يقوم بنفس الشيء في فرنسا، آش يصير؟

Tawfik Mathlouthiماذا ممكن أن تفعله كتدخل إذا تم انتخابك بالنسبة لانتهاكات الحريات وحقوق الإنسان، التعذيب؟ أريد أن أعرف ماذا يمكن أن تفعل؟

Yassine Ayariهذه القضية الأقرب لي طول مشواري،

Tawfik Mathlouthiنعم.

Yassine Ayariأنا رقم هاتفي منشور على الفيسبوك من زمان، عمري ما نحيته، أتعهد أنه لو يكلموني يقولوا ثمة موقوف رفض أنه محاميه يجيه أنا نجي نخلع الباب نتاع الصباح، أنا كنت أفعل هذا وأمور مشابهة بدون بدون أن أكون نائب شعب، هذه قضية مهمة جدا، سأزور سجن المرناقية وين كنت في الحبس،

Tawfik Mathlouthiنعم.

Yassine Ayariوزير العدل اللي هو تو وزير العدل كان وزير الدفاع وقت تجندت يعني تربطني به علاقة،

Tawfik Mathlouthiغازي الجريبي.

Yassine Ayariغازي الجريبي، علاقة يحبني برشة، فسنتلهاو بموضوع سجن المرناقية لأني كنت شاهد عيان وشفت،

Tawfik Mathlouthiعندك علم بالتجاوزات، نعم.

Yassine Ayariكنت غادي،

Tawfik Mathlouthiمش قالوا لك، كنت غادي.

Yassine Ayariورأيت أمور، والله رأيت أمور عيب،

Tawfik Mathlouthiنعم.

Yassine Ayariفي تونس بعد الثورة يصير الشيء هذاكا، عيب عيب معناها وثمة حكايات ما نجمش نحكيها لأن ما يصدقك حد، يقول لك: «مستحيل، رديتنا...».

Tawfik Mathlouthiالسؤال الأخير: إن كانت لديك رسالة للناخبين فماذا، تفضل عندك لانتين وشنو تحب تقول للناخبين؟

Yassine Ayariكلمة واحدة: تونس تستحق ما خير، فعلا.

Tawfik Mathlouthiبارك الله فيك ونحن نتمناو لك كل الخير.

Yassine Ayariيعيشك شكرا.

Tawfik Mathlouthiشكرا على قبول الدعوة وأهلا وسهلا بك يا سي ياسين العياري.

Yassine Ayariمرحبا.

Tawfik Mathlouthiشكرا.