Tunisie Politique: Mohamed Wassef Othmani

Tawfik Mathlouthiمرحبا بكم من جديد في برنامج «تونس السياسية». اليوم نستقبلوا ضيفنا من ألمانيا من برلين وهو أحد المرشحين للحملة الانتخابية الجزئية لمجلس نواب الشعب في تونس على إثر تعيين الممثل في ألمانيا ككاتب دولة في حكومة يوسف الشاهد. وسداً للفراغ، عوض أن يكون القانون يسمح وأنه فيه ما يسمى بالـ suppléant اللي يجي في بلاصة ومباشرة وراء النائب اللي يأخذ وظيفة أخرى أو ينتقل إلى مهمة أخرى، في تونس لا، يلزمنا نعاودوا الانتخابات من جديد ومع تكاليف والدولة أمورها ضعيفة، معليش، نعاودوا الحملة من جديد ونعاودوا الانتخابات وعرس انتخابي جديد قريب إن شاء الله. سي محمد واصف العثماني، مرحباً بك.

محمد واصف العثمانيشكراً على الدعوة سي توفيق. وهذا يشرفني برشا إني نكون معكم متواجد اليوم.

Tawfik Mathlouthiيعيشك، يبارك فيك. إحنا من واجبنا وأنه كل المترشحين مرحباً بهم. نقولها لأنه ما نعرفوش إحنا كل المترشحين في لهذه الحملة في ألمانيا. فاللي مترشح ويحب يتعدى في هذا البرنامج مرحباً به، لأنه نحنا نحب نعطي نفس الحظوظ لكل المرشحين مهما كانت انتماءاتهم السياسية. هذا دورنا كإعلاميين. اللي نلاحظوه كي نقراو السيرة الذاتية بتاع سي محمد العثماني والتجربة السياسية، ثم الصورة فهو شاب ومن الأجيال الجديدة التي تتطلع إلى خدمة البلاد وإلى خوض المعارك السياسية. ونحب نشوفوا معاه شنو اللي خلاه يدخل في المعمعة السياسية في هذه الظروف الانتقالية بعد الثورة التونسية وكيف جاءته الفكرة، وما هو نشاطه المجتمعي، وما هو نشاطه السياسي السابق؟ فهذه كل النقاط. ثم ماذا ينوي القيام به لصالح من سينتخبوه إذا تم انتخابه كممثل للشعب التونسي المقيم بألمانيا في مجلس الشعب؟ سي محمد العثماني هل ممكن نأخذ بسطة عنك، من أنت وكيف أتيت إلى السياسة؟

محمد واصف العثمانيأنا شاب تونسي كي برشا شباب في عمري. قريت في تونس، معناها الـ cycle العادي في كل معناها إنسان أو يعني نقولوا إحنا شاب عايش في تونس. قريت، كملت الباك، طلعت لألمانيا عام 2007 أول 2007. بديت نقرا اللغة الألمانية. قريت وبعد انطلقت في الدراسة في الجامعة التقنية في برلين سنة 2008.

Tawfik Mathlouthiيعني عندك 10 سنين في ألمانيا.

محمد واصف العثمانيبالضبط، قرابة 10 سنين في ألمانيا، نعم.

Tawfik Mathlouthiودخلت في الحياة المجتمعية والتنظيم الاجتماعي للجالية التونسية من إنا وقت؟ من الوقت اللي هاجرت لألمانيا ولا جاتك الفكرة في خوض السياسة بعد الثورة؟

محمد واصف العثمانيالحقيقة بعد الثورة. قبل الثورة كما برشا توانسة كانوا يتبعوا معناها من وراء الـ، bien sûr ما نحكيوش على المناضلين، المناضلين كانوا sur terrain، ولكن فما ناس كانت، أنا منهم زادة كنت نتبع معناها من وراء les écrans. باش نكون معناها صريح مع

Tawfik Mathlouthiكنت راكش وراء l'écran.

محمد واصف العثمانيمش راكش، يعني قاعد ندافع على قناعاتي باللي نجم مع حوارات مع الأصدقاء وكانت كلمتي معناها تتقال معناها مش خايف من حتى حد، لكن ما كانش فما نقولوا إحنا عمل sur terrain كما برشا مناضلين آخرين معناها في تونس اللي نحترموهم.

Tawfik Mathlouthiأيوة.

محمد واصف العثمانيوفي الثورة معناها شفتها نقولوا إحنا فرصة كشاب تونسي إني الحقيقة نشمر على ذراعي ونخدم.

Tawfik Mathlouthiوتساهم.

محمد واصف العثمانيونقدم حاجة لبلادي. وهذي هي كانت أول كلمة معناها قلتها في الـ، معناها يوم ما هرب معناها المخلوع. وكانت مأمن بها ياسر أنه هي فرصة للشباب اللي ربما كان يحس روحه معناها مقموع أو مكتوف الأيدي، أنه يتحرك ويقدم حاجة لبلاده. بحكم أنا نسكن في ألمانيا وعندي علاقة بالتوانسة هنا، دونك قلت نحاول نقدم حاجة لولاد بلادي هنا. دونك في مرحلة أولى كانت

Tawfik Mathlouthiشنو هي أهم المشاكل اللي لاحظتها في 10 سنين إقامة؟ لأنه 10 سنين مش شوية، يعني بديت تعرف وتطلع أنت بنفسك تونسي مقيم بالخارج، واحد منهم يعني. فشن هي المشاكل الأساسية اللي تواجه التوانسة المقيمين بألمانيا، سواء كان في حياتهم في ألمانيا وبصلتهم مع الإدارة الألمانية أو بصلتهم مع الإدارة التونسية عند العودة إلى تونس في العطل؟

محمد واصف العثمانيبحكم إني طالب يعني في الـ، أو معناها ما زلت طالب، معناها نجم نحكي على نقولوا إحنا مشكلة عويصة يتشكوا منها الطلبة في العموم، ومن وقتها إلى حد الآن الحقيقة ما تبدل حتى شيء، هي نقص الإحاطة. أي، الطالب اللي يجي نقولوا إحنا بوه وأمه حطوا له 20-30 مليون باش يطلع لألمانيا، كان ما فماش جمعية locale تخدم باش يلقى صعوبات كبيرة. صعوبات من السكن، صعوبات في إيجاد المعلومة، صعوبات في التوجيه. هذه الكل معناها مشاكل على الأقل في المرحلة هذيكة تعرضت لها أنا وبرشا ناس كيفي. وعلى الأساس هذاكا بالضبط معناها على الأقل كان التحرك نتاعي الأول.

Tawfik Mathlouthiنعم.

محمد واصف العثمانيأنه نحاولوا نلقاو إطار جامع للناس الكل بالاختلافات الكل السياسية وقتها نعرفوا اللي بعد الثورة كان فما نقولوا إحنا برشا نقولوا إحنا تجاذبات سياسية،

Tawfik Mathlouthiهذه مشاكل يعني تخص الشباب بدون، ليس لها علاقة بالانتماءات. يعني هو وصل يلقى روحه وحده ما عندوش شكون يحيطه، ما عندوش شكون يساعده، يعني هذه ما عندهاش علاقة بالانتماء الإيديولوجي ولا السياسي.

محمد واصف العثمانيهي بالطبع هي هذا هو اللي نورمالمون يكون، ولكن في مرحلة من المراحل تعرف أنت شنو صاار معناها في تونس وبحكم التجاذبات هاذية يعني أنا على الأقل كنت من الناس اللي لعبوا دور أنه بالعكس التجميع، أحنا شوية هنا عندنا مشاكل نحاولوا مع بعضنا نجمعوا

Tawfik Mathlouthiأسست يعني جمعية ولا كيفاش؟

محمد واصف العثمانيبالضبط. بعد التحركات نتاع 2011، والعلاقة معناها والاجتماعات اللي عملناهم مع مجموعة من الطلبة، أسسنا جمعية جمعية Tunisian Academic Society هي جمعية طلابية، وأول جمعية في برلين تأسست مع مجموعة من الطلبة اللي إحنا من وقتها لتوا معناها en contact وen bon terme. ترأستها أنا en 2012. وواصلت معناها، استقلت، معناها واصلت عليها فترة، ثم عاد، معناها تم إعادة انتخابي وتوا أنا استقلت منها بحكم خوضي للمرحلة هاذيا الانتخابية.

Tawfik Mathlouthiما حبيتش تعمل cumul يعني بتاع المسؤوليات باش تتفرغ تماماً للحملة.

محمد واصف العثمانيبالطبع، من ناحية، ومن ناحية على الأقل معناها الفصل بين العمل الـ، معناها الجمعياتي اللي هو معناها لازمه أكثر بناء ثقة ويبعد شوية عالسياسة، وبين العمل نقولوا إحنا السياسي اللي هو فيه أكثر تعبير على آراء

Tawfik Mathlouthiيعني باش ما يكونش فما conflit d'intérêts، يعني أنت واضح، تحب تخوض السياسة، تخلي العمل المجتمعي إلى جنب وتتوجه تماماً للسياسة، هذا اللي تقصده.

محمد واصف العثمانيبالضبط. على الأقل في الفترة هاذي.

Tawfik Mathlouthiطيب، يعني هذا أمر يسر كمواطنين توانسة وأنه نشوفوا الشباب بتاعنا شعر بالمسؤولية وبدأ يخوض يعني في الحملات ويتحمل مسؤولياته للمساهمة في بناء الوطن الذي هو له يعني، وللأجيال القادمة، هذا هام جداً. كيف كانت ردة فعل التونسيين لما أعلنت للترشح بتاعك في ألمانيا؟ شنو هي ردة الفعل بتاع توانسة في ألمانيا؟ فماش تشجيع، فماشي adhésion يعني حواليك، فماشي الناس يعني متعاطفين معاك؟ وإلا بحكم أنك لست شخصية يعني عمومية معروفة جداً، ما زلت تتعرف بنفسك وهذا يعني الحملة هذيا هي في الحقيقة بداية للتعريف بمحمد العثماني، أم في داخلك، لا، ليست بداية بالتعريف وإنما للفوز بالمرحلة هذي؟

محمد واصف العثمانيوالله باش نكونوا معناها صريحين، النشاط نتاعي الجمعياتي ما كانش كان نشاط جمعياتي، بعدها معناها كنت عضو لهيئة تنسيقية تنسيقية الجمعيات التونسية في ألمانيا وهذا مكني إني ندور برشا في ألمانيا، ونمشي لبون، لبريمن، ميونخ، إلى مناطق مختلفة ونتعرف على برشا معناها ناشطين جمعياتيين. ومنهم جزء اتصل بي في الفترة هذيكة وقال لي علاش ما تخممش أنك تقدم نفسك للانتخابات هذيا؟ هي فرصة معناها أنك كشاب معناها ناشط وإحنا نعرفوك، علاش ما تقدمش وتحاول توصل معناها على الأقل الأفكار اللي سعيت عليهم في الفترة مع المجموعة الكبيرة اللي قاعدين نخدموا مع بعضنا يعني.

Tawfik Mathlouthiيعني قدمت سابقاً في العمل الجمعياتي حتى الجالية التونسية عرفتك، هو هذا أهم شيء. نحب نسألك سؤال يتبادر إلى ذهني لما أحكي معاك. كما تعلم أنا استقبلت زوج مترشحين قبلك أنت. والميزة بتاع الزوج مترشحين، إذا نقدروا نسميوها ميزة، وأنه ما فيهمش واحد يسكن في ألمانيا. ما فيهمش واحد مقيم في ألمانيا. واحد يسكن في تونس والبرازيل، والثاني يسكن في باريس وهو سي ياسين العياري، والأول هو سي منار اسكندراني. شنو هو أنت تقييمك؟ كيفاش تحس وأنه أنت المقيم في ألمانيا والآخرين parachutés جايين من برة يعني، هل ترى معقول ولا يعني شنو تعليقك على هذا؟

محمد واصف العثمانيالتعليق الحقيقة أنا في مرحلة من المراحل كان عندي برشا نقاشات مع برشا أطراف في الفترة اللي قبل الترشحات. وكان فما رأي على الأقل متواتر أنه المرشح لازمه يكون من دائرة ألمانيا، أو من أبناء الجالية.

Tawfik Mathlouthiنعم.

محمد واصف العثمانيهذا الرأي صحيح معناها أنا سمعته وعبرت عليه لبرشا أصدقاء، معناها سمعته من ناس وعبرت عليه لبرشا أصدقاء من ناحية. ومن ناحية أخرى، أنا عبرت عليه علانية. عطيت l'argumentaire علاش لازمه يكون المرشح من ولاد الجالية.

Tawfik Mathlouthiما انجموش نعرفوا l'argumentaire؟ قلت علاش؟ علاش يلزمه يكون من أولاد الجالية، ولو هو منطقياً يعني le commun des mortels يلزموا يكون من أولاد الجالية لأنه عايش واقعهم. أما شنو هو l'argumentaire بتاعك أنت؟

محمد واصف العثمانيAlors، الـ argumentaire أنا نعطيك حادثة صغيرة. ديسمبر 2016 أحداث برلين. في أحداث برلين هذيا صار اتهام تونسي أنه هو ضالع فيها ومن بعديكة تأكد هذا. في الفترة هذيكة الجالية صار لها رجة. ونقول لك علاش بالضبط، على خاطر أولاً تجبد اسم تونس، ثانياً في أول تعليق لوزير داخلية نتاع نوردراين-فيستفالن، اللي هي في غرب ألمانيا، قال اللي السلطات التونسية معناها ما عملتش الواجب نتاعها. السلطات ما عملتش الواجب نتاعها يعني فما نوعاً ما ضربة لتونس في العموم، وللتوانسة بصفة خاصة.

Tawfik Mathlouthiفما تقصير يعني من السلطات التونسية اللي أشار له هذا الوزير.

محمد واصف العثمانيبالضبط. هو اتهام أو أشار إلى هذا. وفي نفس الوقت معناها أنا يتصلوا بي ناس يقولوا لي يا محمد راو حتى الناس اللي نتعاملوا معاهم، قاعدين يتبدلوا. معناها فما بالحق معناها، آه، تونسي، أنت تونسي، دونك فما ربط اللي هو في الفترة هذيكة الحقيقة حسيت أنا معناها كناشط في المجتمع المدني ومجموعة كبيرة معايا، بالـ danger دونك حاولنا نخرجوا

Tawfik Mathlouthiالاحتقان يعني اللي نشأ من جراء التصريحات هاذية.

محمد واصف العثمانيبالضبط، وحاولنا نخرجوا معناها وقتها في الـ weekend هذاكا باش معناها في البقعة اللي صار فيها الحدث ونقولوا راو نحنا كتوانسة متواجدين في ألمانيا نتعاطفوا مع الضحايا من ناحية ونحن راو نثبتوا أنه الجالية مندمجة تعرف شنو اللي لازمها شنو اللي عليها وشنو اللي لازمها تعمل.

Tawfik Mathlouthiما لها وما عليها، نعم.

محمد واصف العثمانيبالضبط. من الناحية هذيا بالضبط كان عندها impact على الأقل معناها impact médiatique. استدعينا إحنا les médias وقمنا بخدمة باش نوصلوا على الأقل صوت معين من طرف الجالية المندمجة.

Tawfik Mathlouthiوما تخليوش تونس يعني تتجرح بتصريحات بدون ردة فعل.

محمد واصف العثمانيبالضبط. في نفس الوقت هذاكا، أنا شخصياً كنت نستنى من النائب عن دائرة ألمانيا يمثل التوانسة في ألمانيا أنه يجي في ألمانيا هنا sur place، ويحكي في الإعلام ويقابل مسؤولين، ويعطي صورة أخرى على تونس اللي حاول معناها الإعلام يوجه لها أو حاول معناها بعض الأطراف معناها

Tawfik Mathlouthiوهذا ما تمش.

محمد واصف العثمانيوهذا ما تمش. وعلى الأساس هذايا أنا الحقيقة قلت شنو هي دور النائب؟ أنا سألت نفسي شنو هي دور النائب؟ النائب هذايا اللي إحنا انتخبناه والتوانسة انتخبوه، شنو هي دوره؟ هل هو دوره دستوري بحت؟ أي، نقولوا إحنا معناها حسب الدستور هو لازم نقولوا إحنا يصادق على الحكومة، بالضبط،

Tawfik Mathlouthiوالقوانين.

محمد واصف العثمانيمعناها يفوتي على القوانين، يراقب الحكومة، هل هو هذا هذا كهو الـ rôle؟ هل ما فماش دور تمثيلي؟ معناها كيفاش انجموا معناها نقولوا إحنا الدور التمثيلي هذايا نبرزوه أكثر؟

Tawfik Mathlouthiيعني أنت عندك وعي وأنه الممثل للجالية التونسية في مكان معين خارج تراب تونس عنده مسؤوليتين: مسؤولية التي تعود إلى النائب في مجلس الشعب في تونس، والمسؤولية بتاع الجالية اللي في الخارج اللي هي عندها وضع خاص يلزمه يكون هو يمثلها ويلزمه يكون مرتبط بصلة دائمة بها، هذا اللي تقصده.

محمد واصف العثمانيبالضبط. ونزيد نقطة هنا، أنه بحكم أنه ما فماش مجلس وطني للتونسيين بالخارج، اللي من خلاله الجالية على الأقل تنجم توصل صوتها للحكومة وللأطراف التونسية، النائب لازم عليه يلعب الدور هذا.

Tawfik Mathlouthiعلى سيرة هالمجلس الوطني، أنا نتفكر لما كان كاتب الدولة النهضاوي حسين الجزيري مكلف بهذه المهمة بالتونسيين بالخارج، كان فما حوار وكانت فما لقاءات من شأن إنشاء مجلس تمثيلي للتونسيين بالخارج في المهجر. وين وصل هذا؟ تمش تمش انتخابه وتمش تأسيسه؟ ولا كالعادة ملف يفتح وأوقات تمضي وما فماش نتيجة؟ وين وصلنا في هذا؟

محمد واصف العثمانيبالنسبة للمجلس هذايا، تم المصادقة عليه في مجلس النواب سنة 2016 في أوت.

Tawfik Mathlouthiأيوة.

محمد واصف العثمانيوللأسف، كنا نستناو أنه يتفعل في 2017 أو 2018، لكن لم يرصد له معناها نقولوا إحنا التمويلات اللازمة،

Tawfik Mathlouthiميزانية، نعم.

محمد واصف العثمانيوالأمور الترتيبية زادة معناها ناقصة، أنه الأوامر الترتيبية معناها ما زالت ناقصة، دونك ما صارش المجلس هذايا. دونك معناها الرأي على الأقل اللي أنا ندافع عليه أنه مادام المجلس هذايا مش موجود، مادام الجالية ما تنجمش توصل ما عندهاش القنوات اللي باش توصل صوتها لتونس، بالضروري أنه النائب زادة يلعب الدور هذا.

Tawfik Mathlouthiالجالية التونسية الجالية التونسية الناخبة هل لها وعي بالنقطة التي تطرقنا لها عن الممثل المقيم في ألمانيا والذي يحس ويعيش نفس ما يعيشونه والممثل الذي يأتي من الخارج، ما هي ما هو مدى قبول الجالية الألمانية للمرشحين المرسلين من الخارج؟ أو القادمين من الخارج إن لم يكونوا مرسلين.

محمد واصف العثمانيوالله الحقيقة فما معناها على الأقل في الاتصالات اللي عندي أنا،

Tawfik Mathlouthiشنو هي ردود الفعل يعني؟ شنو هي ردود الفعل؟

محمد واصف العثمانيبالنسبة لبرلين، أو في أغلب الاتصالات اللي عندي، هي رافضة أنه يكون معناها إنسان من خارج الجالية. والرفض هذا معناها يجي بحكم أنهم الناس هذوما زادة عايشين معناها بعض المشاكل، ما نحكيوش على نائب bien sûr ملحق اجتماعي، نحكيوا على نائب باش يوصل الصوت هذايا، باش يلعب دور تمثيلي متاعه. دونك الناس تشوف اللي الدور هذا التمثيلي ناقص. وهذاك علاش تقول: «أنا مثلاً، كان إنسان يجي يقدم روحه على ألمانيا البوست في مجلس نواب الشعب يمثلني أنا من غير ما نعرفه أو من غير ما يخدمني، أو من غير ما يوصل لي صوتي نولي ما ننتخبوش». وهذا برشا ناس قاعدة تقول فيه حسب الاتصالات اللي عندي أنا.

Tawfik Mathlouthiباهي. محمد العثماني شاب صغير وعنده طموحات، وهذا طبيعي، ومصر أصلاً لأنه لازم يقع تجديد الأجيال السياسية وهذا مهم جداً وسنة الله في خلقه. لكن كيفاش محمد العثماني باش يقاوم الأحزاب القوية التي اتفقت على اسم واحد وهم ما، يعني حزب النهضة وحزب النداء، اللي توافقوا من أجل المصلحة في هذه الانتخابات باش يعملوا مرشح واحد اللي هو المرشح الندائي؟ يعني عنده ماكينتين حزبيتين وعنده قاعدتين حزبيتين، كيفاش باش يجابه محمد العثماني يعني هالقوة هذه الانتخابية؟

محمد واصف العثمانيكنقطة أولى، على الأقل أنا مانيش ندخل في استراتيجيات الأحزاب، وكل على كل حزب معناها مع احترامنا لكل الأحزاب عنده الحق معناها يختار أو يعمل استراتيجية اللي هو يحب عليها. لكن على الأقل من الناحية هاذيا فما ناس معناها مقتنعة أنه في الفترة اللي فاتت، اللي هي 2011 و2012، كان فما نقص معين في التمثيلية هاذيا. وعلى الأساس هذايا، الناس حبت تشوف حاجة جديدة. حاجة جديدة هاذيا، وهذاك علاش فما معناها الحقيقة نقولوا إحنا زخم أنه ربما علاش ما يكونش مستقل؟ علاش مستحسن خلي نبدلوا شوية، شفنا معناها أحزاب توا خلينا نشوفوا مستقل،

Tawfik Mathlouthiهو هذا هذا الهدف من سؤالي سي العثماني، وأنه اليوم في تونس فما، مش أنا نقول فيه، هذه فما des instituts de sondage، فما محللين سياسيين، فما des think tanks اللي يقولوا في الكلام هذايا، اليوم الأحزاب الكلاسيكية التقليدية تجمع غضب الشعب لأنه ما شافتش نتيجة، وبالذات حزب النداء لأنه اللي صوتوا لسي الباجي قايد السبسي رئيس الجمهورية، يعتبروه ما التزمش بما تعهد به في الحملة الانتخابية بخصوص النهضة، بل بالعكس اليوم فما أكثر من التقارب، فما تقريباً اندماج، وهذا الحال في ألمانيا. فيعني هذه تعتبر فرصة للمستقلين من أمثالك ولا لا؟

محمد واصف العثمانيبالضبط. أنا نشوفها هنا معناها أنه فرصة أنه المستقلين يكون عندهم على الأقل دور. نحكيو هنا على على كرسي كهو، نحكيو على تمثيلية متاع جالية، نحكيو على ألمانيا، وهذا ما يخلي أنه ربما نمشيوا للمستقلين أحسن باش، الهدف هو واضح راو، الهدف أنه في فترة من الفترات معناها كان، الجالية هي صغيرة، قداش فيها؟ 90 ألف مواطن هنا معناها عايشين في ألمانيا، عندك معناها 40% في في غرب ألمانيا وعندك معناها 20 في في في Sud معناها في جنوب ألمانيا، يعني ومجموع، و20 لفوق معناها في هامبورغ و10% في في برلين، معناها هكا à peu près معناها الدائرة القنصلية،

Tawfik Mathlouthiماهيش جالية كبيرة، مقارنة بالتوانسة في فرنسا ولا في إيطاليا، تعتبر الجالية التونسية في ألمانيا جالية جالية صغيرة يعني، فهذا معروف.

محمد واصف العثمانيبالضبط. هي جالية صغيرة، جالية معناها تتميز معناها بالاندماج، جالية فيها كفاءات، وعندا مشاكل. باهي، لكن فما مشكل

Tawfik Mathlouthiطيب، أنا باش نفهم، سامحني، ميسالش نقص عليك. شنو باش يجيب جديد محمد العثماني؟ أنا كل المرشحين اللي استقبلتهم لهنا يعاودوا في نفس الكلام، باش نسمعوا مشاغل الجالية التونسية، باش نبلغوها للبرلمان، باش نحاولوا نحسنوا العلاقة مع السلطات الألمانية. هذا الكلام كلكم متفقين فيه، ما فماش واحد خارج عن السرب في هذا الكلام. شنو باش تجيب جديد، ما هي ميزة محمد العثماني مقارنة بالمرشحين الآخرين؟

محمد واصف العثمانيالميزة نتاعي بالضبط هي الآليات كيفاش باش نوصل للهدف هذايا. عندي زوج نقاط: النقطة الأولى، هو المجتمع المدني المتواجد في ألمانيا واللي أنا زادة عندي علاقة به. المجتمع المدني هذايا موجود actif في ألمانيا،

Tawfik Mathlouthiمش عندك علاقة به، أنت ناشط فيه، أنت مؤسس، نعم.

محمد واصف العثمانيأنا، بالضبط. ناشط فيه وعندي علاقة في إطار معناها تنسيقية الجمعيات، يعني هذا الكل هذا جهاز حاضر، ناس ناشطة، ناس تقدم في خدمات للتوانسة وتربط معناها في العلاقات مع الألمان، هذوما ناس ينجموا يكونوا un relais للنائب. يوصلوا الصوت معناها بتاع التوانسة اللي هما معناها نقولوا إحنا محيطين بهم إلى النائب، والنائب ينجم معناها يعول عليهم باش يتواصل مع الجالية. هذا الجانب الأول، الجانب الثاني هي في القانون الـ، معناها في قانون الداخلي بتاع مجلس نواب الشعب فما الأحقية لكل نائب أنه ينتمي لجمعيات الصداقة البرلمانية. جمعيات الصداقة البرلمانية هاذيا عندنا Zugang، يعني Zugang يعني سامحني، يعني هي علاقة مباشرة بنواب ألمان في البوندستاغ أو في البرلمان الألماني.

Tawfik Mathlouthiنعم.

محمد واصف العثمانيهذا ينجم يعاون ياسر كان نعملوا تواصل

Tawfik Mathlouthiإي، ما توليو زملاء، يعني بين نائب في تونس ونائب في ألمانيا وتربطوا الجسور ويعني وتتكلموا مش فقط في مشاكل الجالية لكن كذلك في العلاقات الاقتصادية والعلاقات السياسية بين تونس وألمانيا. هذا يعني كلاسيكي هذا.

محمد واصف العثمانيهذا هذا هو كلاسيكي ونجموا نفعلوه أكثر، نجموا أحنا معناها، معناها كيفاش نجموا نخموا كيفاش نربحوا منه، نقولوا إحنا تحسين الوضع من الناحية الجمعياتية ومن ناحية

Tawfik Mathlouthiباهي، يقول القائل يقول القائل النائب مستقل، ما زال كي جاء وبقيت له فترة بتاع عامين تقريباً، يعني لأن هذه نص الفترة النيابة، ما تراهش وأنه النائب الألماني يكون يفضل نائب ينتمي إلى الأحزاب الحاكمة حتى يقدر يفعل العلاقات؟ ولكن إذا كانوا نائب مستقل باش يحارب أكثر من غيره، وشو قولك في هذا؟

محمد واصف العثمانيوالله ربما في في ميزات، يعني أنا الحقيقة بحكم النشاط يعني في علاقات حتى مع، معناها منظمات معناها ألمانية اللي حتى تم دعوا دعوها في 14 جانفي اللي فات وقت عملناه في بلدية هنا شارلوتنبورغ، اللي هي معناها بقعة في برلين اسمها شارلوتنبورغ، وعملنا احتفال للثورة، معناها واستدعينا فيه معناها برشا منظمات ومسؤولين ألمان. وهذيكا معناها نقولوا إحنا مش مش منها تعرفت على المنظمات الألمانية أو الأطراف الألمانية، من قبلها، من قبلها فما حركية في سنس

Tawfik Mathlouthiسؤال سؤال مهم، إحنا رينا تحركات بعد الثورة من السلطات الألمانية، والسفير الألماني في تونس كان له تحركات كبيرة وكانت حتى علاقات مع المهدي جمعة وغيره، يعني حتى كان للنكتة يعني كان ياكل في مشوي في جهة النفيضة على الطريق، فكانت ألمانيا تتحرك وفجأة حسينا بنوع من الفتور في العلاقة التونسية الألمانية، رغم يعني العلاقة الحميمية بين ميركل والسيد الباجي قايد السبسي، فـ يعني ماذا يمكن أن تقدموه لتونس؟ لأن تونس اليوم في أشد الحاجة إلى أن نقف بجانبها وبخاصة أولادها اللي في الخارج.

محمد واصف العثمانيالمنظمات الألمانية في العموم تخدم بالثقة. على قد ما تبني ثقة مع أطراف في تونس، وعلى قد ما تكون عندها ثقة كبيرة فيهم على قد ما تخدم معاهم أكثر. في مرحلة من المراحل الثقة هذيا بدات تنقص، بحكم الإشكاليات اللي يلقاوهم في ألمانيا بحكم برشا معناها عوامل أخرى. الثقة هذيا لازمها تتبنى ولازمها تتواصل وأحنا نجموا نساهموا أن الثقة هذيا تتبـ، معناها نبنيوها أو نقولوا إحنا نرمموها sur place هنا في ألمانيا، وهذا نتصور ينجم معناها

Tawfik Mathlouthiيجب يجب يعني إعادة بناء الثقة، وهذا بطبيعة الحال أسهل لشخص مقيم في ألمانيا منه إلى شخص غير مقيم في ألمانيا إذا يحب يبني ويعيد بناء الثقة بين الألمان وتونس، هكا ولا لا؟

محمد واصف العثمانيهذا هو الصحيح يعني، بالضبط.

Tawfik Mathlouthiطيب، في بعجالة، بماذا تعد الناخبين التوانسة باش يصوتوا لك؟

محمد واصف العثمانينوعدهم أنه صوتهم يوصل، أي فما مشكلة نتاع طالب أو نتاع عامل، أو نتاع عايلة، معناها في بقعة من البقايع فما جمعية نقولوا إحنا في المنطقة هذيكة، أنا باش نكون بقدرة ربي عندي معاها اتصال. الجمعية هذيكة هي باتصال مباشر، وأنا نلتزم أني أي حاجة، أي مشكلة نوصلها على الأقل. نوصل الصوت هذايا، ونحاول ندافع على المصالح اللي تخص التوانسة، والحاجة اللي تميز ربما أنه العلاقة هاذيا مع الجمعيات، والعلاقة مع التوانسة الناشطين، وعلاقة مع الناس اللي بالحق مأمنة بخدمة تونس، وبخدمة الجالية ومنهم برشا في ألمانيا، وأنا نأكد هذا.

Tawfik Mathlouthiأنا نشوف في البرنامج بتاعك عدة نقاط، منها الدفاع عن مصالح التونسيين في ألمانيا وهذا طبيعي يعني لأنه هذا أبسط البديهيات، وأنك إذا باش تمثل التوانسة في ألمانيا يعني وأنك باش تدافع على مطالبهم ومصالحهم. إدماج الجالية في معركة التنمية والاستثمار، هذه نقطة مهمة جداً لفتت انتباهي، لأنه شفت البرامج ما ريتش النقطة هاذي، وشفتها نوعاً من التميز فيك أنت. وهو إذا كان تنجح في هذه النقطة يكون رائع جداً، لأنه إذا أدمجت التونسيين المقيمين في ألمانيا في المجهود الاستثماري وفي التنمية الاقتصادية في تونس حتى ما نكونوش ديما نعولوا كان على البراني. يعني تنجمش تفهمنا الفكرة هذيا لأنها نقطة مهمة جداً.

محمد واصف العثمانيالنقطة هاذيا منطلقة من واقع يعرفوه كل تونسي يسمع فينا توا. الواقع هذايا أنه معناها على الأقل التونسي اللي معناها تكون يخدم على روحه ويحاول معناها يخمم شنو ينجم يعمل لتونس، أو شنو ينجم يعمل روحه في تونس، يعني يحاول يبني دار مثلاً، يعمل شي مشروع صغير ولا حاجة هكا. ومن بعد، مثلاً وقت اللي كان في حالة أنه يبني دار باش يهبط لها مرة مرتين في العام ومن بعد لا قدر الله معناها تسرق له. وهو يخمم أنه العمل هذاكا، هو هبط devise لتونس. هذا هام bien sûr، ماناش باش نقصوا من الأهمية نتاعه، لكن فما حاجات أخرى ينجم يعملها باش ينفع بها البلاد من ناحية، ويستنفع زادة هو من ناحية أخرى.

Tawfik Mathlouthiشنو هي؟

محمد واصف العثمانييعني كان إحنا نجموا نربطوا الثقة معناها selon un concept bien، une étude معناها bien sûr هي حاضرة معناها، كيفاش نجموا نربطوا الثقة بين التونسي هنا في ألمانيا بشركاتنا، ومؤسساتنا في تونس اللي يحبوا يطوروا رأس مالهم من ناحية، يحبوا يدخلوا أكثر خدامة، وهكذا تولي فما chance للـ تونسي في ألمانيا أنه يدخل devise للبلاد، ينفستي في الشركات هذوما، ويستنفع منهم. هذه هي الفكرة هذيا.

Tawfik Mathlouthiمع بعضهم، نعم. نعم. بارك الله فيك. شو قولك في، نحب كلمة على المرشحين اللي أنت قاعد تتبارز معاهم لأنه هذا صراع سياسي. كيف تقيم أنت مثلاً، وطبيعي يعني مش معناها عادي باش تتكلم على المرشحين الآخرين، هذه هي المنافسة، وروح المنافسة. كيفاش تقيم مثلاً ترشح منار اسكندراني؟ وبعدها ترشح نائب النداء، يعني مرشح النداء، وسي ياسين العياري؟ بالنسبة إلى محمد العثماني، نحب كلمة على كل واحد باش نعرف يعني أنت للناخبين بتاعك على الأقل يشوفوا شنو الفرق، شنو اللي يفرق بين الثلاثة هذوما؟ وعلاش تتميز على كل واحد منهم أنت؟

محمد واصف العثمانيأولاً، أنا الأسماء اللي ذكرتها الكل نحترمها. ثانياً،

Tawfik Mathlouthiهذا ما نشكوش فيه، خلينا خلينا من اللغة الخشبية، ما زلت صغير، ما تدخلش في اللغة السياسية، اعطينا بالرسمي.

محمد واصف العثمانيفما اتصال معناها ومع الكل نواب

Tawfik Mathlouthiبارك الله فيك، هذا من أخلاقك، وأنك تحترم غيرك، ممتاز. لكن سياسياً؟

محمد واصف العثمانيمن ناحية أخرى،

Tawfik Mathlouthiاش عندك ما تقول مثلاً في ياسين العياري؟ لأنه هو اللي virulent هكا شوية في الحملة، ومتحمس وكل شيء، أنت مثلاً مقارنة بياسين العياري، باش تتميز عليه؟

محمد واصف العثمانيأنا نقول مقارنة بالصديق ياسين العياري، اللي هو عايش في باريس واللي هو ماذا به يروح لتونس، نقول له: الاتصال بالجالية هنا والناس شنو هي تحب معناها تستنى من النائب، راهو معناها وقت باش تأخذ صوت إنسان، عندك مسؤولية. المسؤولية هاذيا ما تنجمش معناها نقولوا إحنا تلتزم بها كان أنت ما عندكش اتصال بعمق التوانسة في ألمانيا. وهذاك علاش أنا من الأول معناها نصحته أنه ربما ما يدخلش للانتخابات هاذيا، وأنه يدعم معناها أحد المرشحين في هدف أنه على الأقل يكون عنده أكثر حظوظ. Bien sûr نحترم معناها أنه هو معناها قدم، وهذا رأي

Tawfik Mathlouthiقرر، واضح، هذا اللي حبينا نسمعوه. وبالنسبة لمنار اسكندراني، الراجل عايش ويتكلم بطلاقة، وعنده صغار ألمان وكان يعيش في ألمانيا، ومن كبار التجار في ألمانيا سابقاً، يعني فيعرف البلاد ويعرف العمق الألماني.

محمد واصف العثمانيهذا ما نشكوش فيه، اللي هو يعرف، ولكن هو مش عايش في ألمانيا. هو ما، معناها ربما متصل بمجموعة من، معناها مجموعة معينة، وهو كان معناها داخل في إطار معناها استراتيجية معينة، وهذا أنا مانيش باش نقيمه، ولكن نقول اللي معناها مش كيما هو يحكي، كيما الحقيقة. هذا هو شنو اللي عندي ما نقول.

Tawfik Mathlouthiيعني فما الحقيقة وفما الواجهة المقدمة. باهي، وسي فيصل، مرشح النداء؟ ونقول فيصل لأنه الحقيقة ما نكذبش على المستمعين، ما نعرفش حتى اسمه يعني شكونه.

محمد واصف العثمانيبالنسبة لسي فيصل، اللي هو الدكتور معناها، يعتبر من الكفاءات التونسية معناها في ألمانيا، هذايا جانب. بالنسبة للجانب السياسي، الحقيقة معناها بالنسبة لحركة نداء تونس وحزب نداء تونس، في الأخير الناس معناها هي تقيم، وقيمت وأنا عندي اتصالات معناها يومية اللي الناس تقول: «لا، خلينا نبعدوا على الأحزاب، ومع احترامنا للمرشح»، هذايا ديما فما الكلمة هاذيا، على خاطر concrètement أنت بعد تتبع حزب، يعني عندك حمل نتاع الحزب هذا، وفي الأخير معناها

Tawfik MathlouthiAssumer le bilan بتاع الحزب، يعني أنت تتحمل

محمد واصف العثمانيبالضبط، معناها الناس باش تحكم عليك على الـ bilan نتاعك معناها، بقطع النظر عن كفاءتك،

Tawfik Mathlouthiعن شخصك وعن كفاءتك. باهي. البرنامج أشرف على النهاية، كلمة أخيرة تصور وأنك أمامك الجالية التونسية، تفضل اش عندك ما تقول لها.

محمد واصف العثمانيبالنسبة للجالية التونسية، اللي هما خواتي، وأصحابي، وعايلتي، أنا مآمن اللي صوتنا الكل، وصوتكم لازم يوصل. مآمن اللي فما الدولة التونسية قاعدة تعمل في جهدها، لكن الجهد هذايا ناقص، فما إحاطة ناقصة، فما توانسة عندهم مشاكل، فما أطراف ألمانية الثقة معاها تضعضعت، هذا الكل نجموا نبنيوه مع بعضنا، نبنيوه مع بعضنا وقت اللي نتكاتفوا، نخدموا مع بعضنا، نخدموا الجمعيات، نخدموا التوانسة هنا في ألمانيا، ننشطوا الكل، هذا هام ياسر، ونساهموا مع النائب، اللي هو لازم يلعب زادة الدور التمثيلي، في إيصال صوتنا لتونس، في إعانة تونس، وفي حب تونس مع بعضنا، هذايا ما عندي ما نقول.

Tawfik Mathlouthiشكراً سي محمد العثماني على تلبية الدعوة، ونتمنى لك النجاح كما نتمناه للباقي، والأحسن هو اللي ينجح إن شاء الله في صالح تونس، وهذا هي دائماً القاعدة الوحيدة، الكل من أجل تونس. بارك الله فيك، وإلى اللقاء إن شاء الله.

محمد واصف العثمانييعيشك.

Tawfik Mathlouthiوإلى اللقاء، بالسلامة.

محمد واصف العثمانيبالسلامة.